ഗോഹട്ടി: ഗായകൻ സുബീൻ ഗാർഗിന്റെ മരണത്തിൽ ദുരൂഹതയില്ലെന്നു സിംഗപ്പുർ പോലീസ്. ഗായകന്റെ മരണത്തിലെ ദുരൂഹതയെക്കുറിച്ച് അന്വേഷിക്കാൻ ആസാം സർക്കാർ രൂപീകരിച്ച പ്രത്യേകസംഘം കോടതിയിൽ കുറ്റപത്രം സമർപ്പിച്ചിരിക്കുന്ന ഘട്ടത്തിലാണ് സിംഗപ്പുർ പോലീസിന്റെ വെളിപ്പെടുത്തൽ.
കഴിഞ്ഞ സെപ്റ്റംബർ 19 നു സിംഗപ്പുരിൽവച്ചാണു സുബീൻ ഗാർഗ് മരണമടഞ്ഞത്. കടലിൽ കുളിക്കുന്നതിനിടെ അപകടത്തിൽപ്പെടുകയായിരുന്നു. ഒട്ടേറെ ദുരൂഹതകൾ ആരോപിക്കപ്പെട്ടതിനെത്തുടർന്നു കേസന്വേഷണത്തിന് ആസാം സർക്കാർ പ്രത്യേക സംഘത്തെ നിയോഗിക്കുകയായിരുന്നു. ഇവർ ഏഴുപേരെ ഇതിനകം അറസ്റ്റ്ചെയ്തു.
മുന്നൂറോളം സാക്ഷികളുടെ മൊഴി രേഖപ്പെടുത്തി. ഇതിനിടെയാണ് മരണത്തെക്കുറിച്ച് ശാസ്ത്രീയമായ അന്വേഷണത്തിൽ ദുരൂഹതകളില്ലെന്നു വ്യക്തമായതെന്ന് സിംഗപ്പുർ പോലീസ് പറഞ്ഞത്.അഭ്യൂഹങ്ങൾ പ്രചരിപ്പിക്കരുതെന്നും സിംഗപുർ പബ്ലിക് അഫയേഴ്സ് വകുപ്പ് ആവശ്യപ്പെട്ടിട്ടുണ്ട്.